Бүгүн, алтынньы ый 25 күнүгэр, Саха сирин норуодунай бэйиэтэ Петр Николаевич Тобуруокап төрөөбүтэ 108 сыла. Бу күнү көрсө Нам нэһилиэгэр «Кэнчээри» оҕо уһуйаана уонна П. Н. Тобуруокап түмэл-уһаайбата сылын ахсын «Күннүүн оонньуур күөрэгэйдэр» диэн иитиллээччилэргэ хоһоон күрэҕин ыытар. Ол чэрчитинэн бэлэмнэнии бөлөх оҕолоро иитээччилэрин уонна төрөппүттэрин кытта түмэл-уһаайбаҕа кэлэн бэт тэрээһиҥҥэ кытыннылар. Ол курдук экскурсовод Саввинова Г. П. оҕолорго түмэл устун бэйиэт олоҕун, айар үлэтин туһунан билиһиннэрдэ. Нам олохтоох библиотекаря Саввинова У. Ю. Бүөтүр Тобуруокап оҕолорго аналлаах аан бастакы кинигэтиттэн саҕалаан кэлин тахсыбыт кинигэлэрин көрдөрдө. Онтон оҕолор бэлэмнэнэн кэлбит хоһооннорун доргуччу ааҕан хоһоон күрэҕэр кытыннылар. Бастыҥ хоһоону ааҕааччыннан Слепцова Нарыйаана, иккис миэстэ Кардашевскай Александр, үһүс миэстэ Жендринскэй Айсаан буоллулар. Кыайыылаахтар добун сурук, кыттааччылар туоһу сурук уонна минньигэс бэлэх ылан үөрдүлэр-көттүлэр. Онтон оҕолор Тобурокап айымньыларынан альбом-кинигэ оҥорон түмэлгэ бэлэх оҥордулар.
