Сэтинньи 11 күнүгэр Үөһээ Бүлүүтээҕи кыраайы үөрэтээччилэр түмсүүлэрэ уонна ЦОСП»Сэргэх» чилиэннэрэ буолан Кыадаҥдаҕа сылдьан кэллибит. Айаммыт сыала Гаврил Иосифович Чиряев 100 сылын туолбутунан, төрөөбүт дойдутугар түмэл көрөн, олохтоохтору кытта төгүрүк остуол тула атах тэпсэн олорон сэһэргэһии. Көрсүһүү туһунан Үөһээ Бүлүүтээҕи кииннэммит библиотечнай ситим кыраайы үөрэтиигэ отделын салайааччыта Егорова Галина Алексеевна суруйар: «Г.И.Чиряев түмэлин директора Михаил Семенович Томскай уонна үлэһиттэрэ Үөһээ Бүлүүттэн барбыт делегацияны олус бэлэмнээхтик көрүстүлэр, саҥа талыллыбыт баһылыктара Прокопьев Николай Мартович кэлэн билистэ, эбиэккэ диэри сылдьан бииргэ эбиэттээтибит. Михаил Семенович нэһилиэгин, биллэр дьонун-сэргэтин, Гавриил Чиряев туһунан сиһилии кэпсээтэ. Иһиттэр-истэн олоруох курдук кэпсиир. Чачы ууһа Нам Хатырыгыттан төрүттээҕин, онтон кэлии дьон диэн эттэ, Үөһээ Бүлүү Намын кытта биир силистээх-мутуктаах дьон диэн буолла. Онон ону кыттыһан үөрэтэргэ биир бырайыак оҥорорго куоластаатыбыт. Кыадаҥда, Харбалаах, Өргүөт, Нам да устуоруйалара алтыһыылара элбэх эбит. Иккис бырайыак саас Чиряев Г. улааппыт дьиэтигэр краеведтар хоно сытан кэпсэтиэххэйиҥ, кус-балык сиэхпит, — диэтэ. Биһигиттэн Степанов Георгий Алексеевич Гавриил Иосифович Үөһээ Бүлүүгэ үлэлээбит сылларын кэпсээтэ, Саввинова Уруйдаана Юрьевна Гавриил эбэлэрэ Балаҕаннаахтан Быракаантан, төрүттээхтэрин, метрикаларын көрдөрөн кэпсээбитэ сэҥэриини ылла, үгүстэргэ саҥаны арыйыы буолла. Семенова Евдокия Павловна Чиряев Ойуунускай, Кулаковскай ааттара төннүүтүгэр үлэтин, Барахов аатын үйэтитиигэ үлэтин кэпсээтэ. Васильева Любовь Алексеевна архыыптан булбут материалларын быыстапкалаан, экраҥҥа көрдөрөн наһаа истиҥник кэпсээтэ. Докумуоннар бары Гавриил Чиряев илии баттааһыннаахтар. Бу иннинэ М.С.Томскай үлэһит дьоҥҥо наһаа болҕомтолооҕун, бэйэтэ тыа үлэтин билэрин кэпсээбитин Үөһээ Бүлүү холобуругар көрдөрдө. Социалистическай куоталаһыыга биир сылга Үөһээ Бүлүүлэр Бүлүүнү хоппуттарын туһунан эппитигэр, атын сылларга хайдах этэй,-диэн чуолкайдастылар. Алексеева-Оюрова Анна Васильевна эмиэ саамай интэриэһиргиир темаларын кэпсээтэ, сири-дойдуну үөрэтиини, Чочу күөлүн аатын туһунан. Михаил Семенович наһаа байдыбыт, элбэҕи биллибит диэн үөрүүтүн бэлиэтээтэ. Бииргэ үлэлиэххэ диэн ыҥырда. Чиряев музейа саҥа киирбит, благоустройстволаах, баай экспонаттаах эбит, кэпсиирэ да толору. Үчүгэйдик сылдьан кэллибит, икки өттүттэн хардарыта билиибит кэҥээтэҕэ.»
