Бүгүн, 2022 сыл олунньу 1 күнэ, илиҥҥи халандаарынан Саҥа дьыл үүнэр күнэ буолар. Онтон сарсын, 02.02.2022 сыл диэн эриэккэс сыыппаралартан турар күн үүнэр. Дьэ бу күннэр, илиҥҥи Фэншуй астрологията этэринэн, киһи баҕа санаатын толорорго сөптөөх аптаах күннэр буолаллар. Дьэ ону биһиги хайдах туһанабыт?
Билиҥҥи кэмҥэ үгүс дьон Баҕа санаа хаартатын (Карта желаний) диэни оҥорор буолла. Бу хаарта сыала-соруга диэн, киһи баҕа санаатын хараҕынан уобарастаан көрөн, үөрүүлээх иэйиини уһугуннаран, тус сыал-сорук туруорунан, тыл, санаа күүһүн туһанан олоххо киллэрии.
Хаарта тоҕус чаастан (сектортан) турар. Хас биирдии чааһа сөп түбэһэр тус өҥнөөх, анал өйдөбүллээх буолар. Ыраас кумаахыга, анал телефон приложениеларыгар, компьютерга, истиэнэҕэ иилэн да оҥоруохха сөп.
Саамай үлэлээҕэ сөптөөх ойуулары булуу буолар. Куйаар ситимиттэн сөптөөх ойуулары бэчээттээн таһааттарыаххытын, сурунаалтан кырыйыаххытын сөп. Эбэтэр баҕа санааҕытын, цитаталары, киһини кынаттыыр этиилэри суруйдаххытына эмиэ сөп буолар. Баҕа санааны суруйуу биир уратылаах, ол курдук «баҕарабын» диэн буолбакка, сибилигин буола турарын курдук суруллуохтаах, утарар тыл туттуллуо суохтаах, холобур, “Мин ыалдьыахпын баҕарбаппын” буолбакка “Мин доруобуйам чэгиэн-чэбдик!”.
Ортоку секторга бэйэҥ мичээрдээбит, үөрбүт-көппүт кыраһыабай хаартыскаҕытын ууруҥ. Хаартыска ханан да кырыллыбатах, бүтүн буолуохтаах.
Үөһээ хаҥас Баай-дуол секторыгар дьиэ, массыына, харчы, көмүс киэргэл иилиллэр. Манна биир уратыта, харчы ойуута билэр туттар харчыгыт буолуохтаах, көтө сылдьыа суохтаах, чиҥник сытар, эбэтэр илиигэ буолара ордук.
Үөһээ ортоку Албан аат сектора диэн. Манна кубоктар, мэтээллэр, грамоталар, «кыһыл дорожка” ойуулара барсыахтара.
Үөһээ уҥа диэки Таптал сектора. Манна тапталлаахтар ойууларын иилэр буоллаххытына дьон сирэйэ көстүө суохтаах.
Ортоку хаҥас өттүгэр Дьиэ-кэргэн секторыгар күлбүт-үөрбут дьиэ-кэргэнин, чугас аймахтаргыт, табаарыстаргыт хаартыскаларын ууруҥ. Дьиэ кыылларын эмиэ бу секторга иилэллэр.
Оҕолордоох, төрүүр баҕаҕыт суох буоллаҕына, Оҕо секторыгар оҕо уруһуйун иилбэккит ордук. Ол оннугар сөбүлүүр дьарыккытыгар сөптөөх ойууларда иилиҥ.
Аллараа хаҥас секторга туох саҥаны билиэххитин, сатыаххытын баҕараргытын көрдөрөр ойуулар, ортоку секторга комфортнай сырдык үлэлиир миэстэҕитин көрдөрөр ойууну сыһыарын.
Аллараа уҥа бары саамай сөбүлүүр сектордара, ол курдук уоппускаҕа сынньана барыаххытын баҕарар сиргит ойуутун хайаан да иилиҥ. Маны таһынан кумир оҥостор, кини курдук буолуоххутун баҕарар киһигит хаартыскатын ууруоххутун сөп. Кини учүгэй хаачыстыбаларын суруйан чопчулаан биэриҥ. Сорохтор араҥаччылаатын диэн сибэтиэйдэр ойууларын сыһыараллар эбит.
Баҕа санааны дьиҥнээхтик баҕарар, чахчы туолуон сөп эрэ буоллаҕына сыһыарыҥ, холобур кими эрэ үтүктэн яхта, дворец сыһыардаххытына туолара саарбах.
Биир да секторы кураанах хааллларыман, барытын тэҥник сыһыара сатааҥ. Хаартаны имиппэккэ бүөм соҕус сиргэ, холобур ыскаап аанын иһинээҕи өттүгэр иилиэххитин сөп.
Баҕа санаа хаартата үлэлээн барарын туһугар, бастаан биир туолар баҕа санааны тута толоруохтааххын. Холобур, итии кофелаах чааскы ойуутун сыһыаран баран, наһаа үчүгэйдик “Мин баҕа санааларым туоллуннар” диэн санаан олорон кофета оҥостон ис. Төһөнөн итэҕэйэҕин, иэйиигин уһугуннараҕын, үөрэ-көтө кэтэһэҕин соччонон баҕа санааларгыт олоххо киирэн иһиэхтэрэ. Онон бу табыгастаах күннэри мүлчү туппакка, баҕа санааларгыт барыта туолалларыгар баҕарабын!
