2022 сыл Үөһээ Бүлүү улууһугар Ийэ тыл сылынан биллэриллибитин Нам нэһилиэгин дьоно үөрэ иһиттэ. Бу бэлиэ сылы Нам олохтоохторо төрөөбүт төрүт тылга сыһыаннаах күрэхтэргэ кыттан ситиһиилэринэн саҕалаатылар.
Үөһээ Бүлүү улууһа төрүттэммит күнүгэр аналлаах улуус бибилэтиэкэтин ситимэ тэрийбит тургутугар Нам нэһилиэгин ытык кырдьаҕас олохтооҕо Попова Елена Егоровна 3 миэстэни ылары ситистэ. Бу күрэххэ уопсайа сүүрбэттэн тахса үлэ киирбититтэн, Нам нэһилиэгиттэн үс киһи кытынна, ол курдук Семенова Наталья Яковлевна уонна Ю Любовь Васильевна туоһу суруктарынан бэлиэтэннилэр.
Гаврильева Людмила Михайловна-Мила айар абылаҥҥа ылларбыта добуочча буолан эрэр, кини хоһоонноро сахалыы сайаҕастар, истиҥнэр, бэйэтин курдук нарыннар. Куйаар ситиминэн хоһоон күрэхтэригэр кыттан элбэх добун суруктардаах. Ол курдук бу сыл эмиэ ситиһии сиэтиилээх буолла. Тапталлаахтар күннэригэр аналлаах “Таптал нарын иэйиитэ” диэн Саха Өрөспүүбүлэкэтин суруйааччыларын сойууһун, Норуоттар икки ардыларынааҕы суруйааччылар сойуустарын холбуһугун, Россия суруналыыстарын сойууһун чилиэнэ Александра Григорьева-Сандаарыйа дьүүлүнэн Мииринэй оройуонугар ыытыллыбыт хоһоон күрэҕэр II үрдэл добун суругун тутан үөрүүтэ үс төгүл үрдээтэ.
Нам бибилэтиэкэтин ааҕааччылара Ю Любовь Васильевна уонна Гаврильева Людмила Михайловна куйаар ситиминэн уус-ураннык хоһоон ааҕыытын күрэхтэригэр кыттан кэккэ ситиһиилэннилэр. Ол курдук Любовь Васильевна “Төрөөбүт төрүт тылга таптал” диэн “Школа третьего возраста Республики Саха ( Якутия)” общественнай түмсүү ыыппыт күрэҕэр I үрдэл дипломун ылан үөрүүтүн үллэһиннэ.
Маны таһынан Бүлүүтээҕи “Алгыс” сынньалаҥ киинэ тэрийбит Иван Гоголев-Кындыл төрөөбүтэ 92 сылыгар аналлаах “Хоһооннорум – оҕолорум” уус-уран ааҕыы күрэҕэр II истиэпэннээх үрдэл хаһаайката буолла.
Дьүүллүүр сүбэлэр биһирэбиллэрин ылбыт Иван Гоголев-Кындыл “Кыталыктар үҥкүүлэрэ” хоһоонун уус-ураннык ааҕар Ю Любовь Васильевна.
Туоһу суруктарынан бигэргэммит уус-уран ааҕыылар кыттыылааҕа Гаврильева Людмила Михайловна эһиги истиигитигэр Ирина Колодезникова-Ымыы “Ый кыыһа” хоһоонун ааҕар.
Куруук да маннык көхтөөхтүк күрэхтэргэ кыттан өйү-санааны чэбдигирдэн, ийэ тыл сүмэтин иҥэринэн, айар абылаҥҥа ылларан төрөөбүт төрүт тылгытын өрө тутаргытыттан биһиги тэҥҥэ үөрэбит, өссө да элбэх ситиһиилэри баҕарабыт !
