НАМСКАЯ МОДЕЛЬНАЯ СЕЛЬСКАЯ МОДЕЛЬНАЯ БИБЛИОТЕКА им. М. С. Романова

“Айар үлэ алыбар ылларан, айаатыыр үйэм арҕаһыгар ыттыам”

Олунньу 26 күнүгэр Үөһээ Бүлүү улууһун Нам нэһилиэгэр М. С. Романов аатынан олохтоох бибилэтиэкэҕэ Саха сирин биллэр бэйиэтэ, биир дойдулаахпыт Харлампьев Василий Пудович – Хара Лааҥкы күн сириттэн күрэммитэ 40 хонугун туолуутугар кэриэстэбил күнэ ааста.

Бу күн Нам бибилэтиэкэтигэр курус, эмиэ да үөрүүлээх түгэн буолла. Хара Лааҥкы тапталлаах кэргэнэ Полина Петровна, кыыһа Ирина Васильевна уонна күтүөтэ Герман Юрьевич суруйааччы боруонсаттан кутуллубут бюһун бибилэтиэкэҕэ бэлэх ууннулар. Бюһу Саха сирин биллиилээх скульптора, Үөһээ Бүлүүттэн төрүттээх Семен Кириллович Прокопьев бэйиэт мөссүөнүн үүт-үкчү гына чочуйан таһаарбыт. Кыыһа Ирина Васильевна аҕата тыыннааҕар хайдах курдук дойдутун дьонун таптыырын, мэлдьи үтүө тылларынан ахтарын туһунан этэн туран, нэһилиэк олохтоохторо көрө сырыттыннар диэн бэлэх ууналларын бэлиэтээтэ. Тэрээһини Василий Пудович чугастык алтыспыт доҕордоро, үөлээннээхтэрэ Саха сирин биллиилээх суруйааччыта Дмитрий Федосеевич Наумов уонна П. Н. Тобуруокап түмэлин дириэктэрэ, суруналыыс Иван Егорович Чычахов иилээн-саҕалаан тэрийдилэр. Чугас доҕордоро истиҥ өйдөбүлү хаалларар үгүс үтүө тыллары эттилэр, умнуллубат түгэннэри кэпсээтилэр. Үөһээ Бүлүүтээҕи бибилэтиэкэ ситимин директора Петрова Наталья Кирилловна бу сүдү бэлэх буоларын өссө төгүл тоһоҕолоото, Хара Лааҥкы дьиэ кэргэнигэр махталын эттэ. Бибилэтиэкэ сэбиэдиссэйэ Саввинова Уруйдаана Юрьевна “Айар үлэ алыбар ылларан, айаатыыр үйэм арҕаһыгар ыттыам” диэн бэйиэт чаҕылхай чопчу тылларынан кинигэ, хаартыска быыстапкатын билиһиннэрдэ. Манна Василий Пудович айар уонна тус олоҕун туһунан Саввинова Галина Павловна оҥорбут хаартыска буклета, суруйааччы сурунаалга тахсыбыт эрдэтээҥи хоһоонноро, алта кинигэтэ, айымньыларыгар рецензиялар быыстапкаҕа турдулар. Саха сирин чаҕылхай лиирик бэйиэтэ Харлампьев Василий Пудович-Хара Лааҥкы сырдык аата үйэтиллэ, ахтылла туруо диэн бигэтик эрэнэбит.