Бибилэтиэкэр Саввинова У. Ю. Дьокуускай куоракка муус устар 9-10 күннэригэр САССР тэриллибитэ 100 сылын көрсө, СӨ историктарын уонна кыраайы үөрэтээччилэрин научнай-практическай кэмпириэнсийэлэригэр “Хаан хаалбат, көлүөнэ көппөт” диэн дакылаатынан кыттан лауреат аатын ылла.

Муус устар 21 күнүгэр П. Н. Тобуруокап аатынан Нам орто оскуолатыгар улахан сүһүөх кылаастарга “Биһиги Бараахаппыт” диэн И. Н Барахов олоҕун, үлэтин туһунан интеллектуальнай оонньуу ыытылынна. Манна 10-с кылаас үөрэнээччилэрэ 1 миэстэни, 9-с кылаас 2-с миэстэни, 8-с кылаас 3 миэстэни ылан Добун суруктарынан бэлиэтэннилэр.

Бу күн “Кэнчээри” оҕо уһуйаанын улахан уонна подготовка группатын оҕолоругар “Исидор Барахов оҕо сааһыттан” диэн В. И. Сергеева ахтыытынан (Исидор Барахов : төрөөбүтэ 110 сылын көрсө : ыстатыйалар уонна ахтыылар / [хомуйан оҥордулар: Ю. И. Васильев-Дьаргыстай, В. Д. Михайлов]. – Дьокуускай : Бичик, 2008. – 208 с.) бэрт сэргэх дьарык буолла. Ол курдук оҕолор слайда ойуутун көмөтүнэн кылгастык ахтыыттан иһиттилэр. Исидор Барахов оҕо сылдьан сөбүлээн оонньуур крокет диэн оонньууну кытта билистилэр, кумаахыттан туос оҕустары оҥорон оонньоотулар.

Муус устар 22 күнүгэр О. Д. Федорова аатынан киин модельнай бибилэтиэкэҕэ сылын аайы ыытыллар “Дойду дьонноох, киһи суоллаах” диэн Өрөспүүбүлэкэ төрүттэммитэ 100 сылыгар аналлаах өй күрэҕэ буолан ааста. Бу күрэххэ Нам нэһилиэгин хамаандата үһүс сылын субуруччу бастаан көһө сылдьар мэҥэ тааһы ылар чиэскэ тигистэ. Нам хамаандатын чиэһин көмүскээтилэр: Петрова Мария Гаврильевна, Саввинова Галина Павловна, Саввинова Нина Родионовна, Аввакумова Сардана Леонидовна, Ю-Болтокова Любовь Васильевна.

Муус устар 26 күнүгэр оскуола оҕолоро өрөспүүбүлэкэ таһымнаах икки тэрээһиҥҥэ кытыннылар. Бастакы тэрээһин “Символы Якутии. 100 лет ЯАССР” диэн олимпиада буолла. Бу олимпиадаҕа оҕолор сылын аайы көхтөөхтүк кытталлар, быйыл уопсайа 91 оҕо кыттыыны ылла. Иккис тэрээһин “100 фактов о Якутии в честь столетия” диэн медиаурок көрдүлэр, бу видеоҕа дойдубут туһунан уопсайа 80 чахчы (факт) этиллэр, 20 чахчыны оҕолор бэйэлэрэ этинэннэр суруйуохтаахтар. Бу тэрээһиҥҥэ уопсайа 101 оҕо кыттыыны ылла. Оскуола иһинэн буолар тэрээһиннэргэ көмөлөспүт оскуола бибилэтиэкэригэр Петрова М. Г. уонна кылаас салайааччыларыгар махталбытын тиэрдэбит.